499/2023-2024
Aizawl, 19th May 2023: Nizan khan Central Building & Other Construction Workers (CB&OCW) Advisory Board Chairman Pu V. Srinivasa Naidu chuan Larsap Dr. Hari Babu Kambhampati chu a chenna in, Raj Bhavan-ah a hmu a. He hunah hian CB&OCW Advisory Board Chairman Advisor Pu Mohana Nagaraja, Labour, Employment, Skill Development and Entrepreneurship (LESDE) Secretary Pu Lalramsanga Sailo leh Director Pi Angela Zothanpuii ten Chairman hi an tawiawm a ni.
LESDE Department hotute chuan Larsap leh CB&OCW Advisory Board Chairman te chu Mizoram Building & Other Construction Workers Welfare Board (MB&OCWWB) chanchin tlangpui – an hmalakna hrang hrang bakah hlawhtlinna an chan tawh te leh harsatna an tawh mek te an hrilh a. Larsap chuan MB&OCWWB hnuaia hnathawktu inziaklut an pung zel te, sum hmuh leh sem chhuah pung te chu lawmawm a tih thu a sawi a. LESDE Department hotu ten a hnena harsatna an thlen te chu Larsap chuan a ngaihpawimawh thu hrilhin, a tul anga sawrkar laipuia thlenpui a tiam bawk a ni.
Larsap chuan Pu V. Srinivasa Naidu chu Mizoram a lo tlawh avangin lawmthu a hrilh a. Mizorama inhlawhfate dinhmun sawipuiin, ram leilung fa ten hna tam zawk an thawh a duhsak thu a sawi bawk. Inhlawhfate hamthatna tura LESDE Department hotute inpekna chu fakawm a tih thu leh MB&OCWWB hnuaia scheme hrang hrang kalpui mek te chu tha a tih thu Larsap chuan a sawi a. Hetih rual hian inhlawhfa thin ten hamthatna tam zawk an neih theih nan insurance scheme dang Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) ah te inziaklut se a duhsak thu sawi bawkin Larsap chuan hemi kawnga hmalakpuiah kalkhawmte chu a sawm nghal a ni.
MB&OCWWB hi kum 2009 khan din a ni a. LESDE Minister chu Chairman niin, LESDE Secretary chu Vice Chairman a ni a, LESDE Director chu Secretary a ni bawk; Board memberah hian Central leh state sawrkar bakah Trade Union aiawh te an tel a. An hnuaia inziaklut te tan hamthatna hrang hrang - Children's Educational Assistance, Medical Assistance, Disability Benefits, Death Benefits leh adangte an nei a. MB&OCWWB hian a din tirh atangin cheng vaibelchhe 231.82 a hmu tawh a, inhlawhfa mi 1,62,694 te hamthatna atan cheng vaibelchhe 115.6 a sem chhuak tawh a ni. Hamthatna dawngtu te hi an bank account-ah pawisa thunsak thin an ni a, member-te hi an khua theuhah ‘live verification’ tihsak an ni tawh bawk. Sawrkar kum liamta (2022-23) chhung khan MB&OCWWB chhiah (cess) hmuh leh sem chhuah te chuan kum hmasa aiin pun lam a pan a. LESDE Department-in tunhnaia Mizoram Mega Job Fair a buatsaih atangin thalai hna hmu 120 an awm tawh a, hei hi la pung zel tura beisei a ni.
