Industrial Training Institute (Craftsmenship Training)
Heng hmunah te hian Training Institute din a ni.
(1) Aizawl (2) Lunglei and (3) Saiha
India in 1947 a zalenna a neih hnu 1950 ah khan ram chhung Industry ten hnathawktu thiam leh tha an neih zel theih nan sawrkar laipui chuan "Ruahmanna" a siam a. He ruahmanna hi "Craftman Training Scheme" (CTS) an ti a. He CTS hnuaiah hian ram chhung hmun hrang hrangah sawrkar laipuiin ITI a din a, amaherawhchu heng ITI te enkawl hna hi an awmna State/UT sawrkar theuh kutah 1956 atang khan a hlan a, ITI enkawlna sum leh paia thuneihna pawh sawrkar laipui chuan April 1, 1969 atang khan State/UT sawrkar kutah a hlan fel nghal a ni.
Craftsmen Training Scheme thil tumte:-
a) India ramin a mamawh ang zela hnathawktu kut themthiamte chherchhuah.
b) Industry-a hnathawktuten an thilsiamte hlawk zawk leh tha zawk an siam theihna tura a tul ang zela zirtir.
c) Thalai rualte enzawnna tlingkhawp kutthemthiamna nei thei tura zirtir.
ITI hlutna te:-
Sawrkar laipuiin 1956 atanga ITI enkawl hna State/UT sawrkar te a hlan hnu khan ITI zawng zawngin zirlai thuhmun leh kaldan thuhmun an neih zui zel theih nan mawhphurtu "Council" a din nghal a, "National Council for Vocational Training (NVCT)" tih a ni. ITI zawng zawng NCVT ah hian an inziak lut vek tur a ni a, exam (All India Final Trade Test) pawh ITI zawng zawng tan a rualin NCVT hian a buatsaih thin a, a hlawhtlingte hnenah Certificate (National Trade Certificate) a pe thin a ni. Hetian a nih avang hin India rama ITI, NCVT-in a pawm zawng zawngten an pawm (recognised) vek a, chuvangin ITI pass tawhte tan chuan India ram khawi hmunah pawh hna zawn emaw thawh a awlsam em em a ni.
Industrial Training Institute tuna Aizawl ami hi kum 1964 August khan Assam State-a Shrikhona ah din a ni a. Mizoram Union Territory a nih hnu kum 1975 May thla khan tuna a dinna hmunah hian sawn a niin, Education Department Directroate hnuaiah dah a ni. Hetih hun lai hian Trade pangah chauh training theih a ni a, chungte chu:- Electircian, Wireman, Motor Mechanic Fitter leh Welder te an ni. Kum 1981 ah Mizoram Sawrkarin Labour & Employment Department, Directorate Office a din khan he Industrial Training Institute hi Labour & Employment Department hnuaiah hian a dah ta a ni. He Training Institute hian a tum ber chu:-
1. Mi harsa, zirna sang zawk zir thei lo leh thalai hna thawh tur hre lote eizawnna tlingkhawp kutthemthiamna nei thei tura zirtirna (training) pe a, eizawnna nghialnghet kawhhmuh.
2. Lehkhathiam hna hmu lote training pea mahnia enzawnna ngelnghet kawhhmuh.
3. Thalaite Industry lama ke an pen theihna turin training peka tuaihriam.
Labour & Employment enkawlna hnuaiah hian I.T.I. pathum Aizawl, Lunglei leh Saiha te a awm a. Heng I.T.I.-ah te hian thiamna chi hrang hrang craftsmen training theihna Trade 30 lai a awm a. Heng bakah hian Trade dang pawh hawn belh tum mek a ni. I.T.I. a zirlaite tan hian kumtin Book Grand Rs.1000/- leh thlatin Stipend Rs.500/- zel zirlai pakhat tan pek thin an ni. Training hun chhung hi kum 1 course chi leh kum 2 course chi a awm a. Session hi kumtin August thlaah tan a ni. He Institution hian zirlai thingtlang mite khawpuia awmna hre lote tan Hostel mipa leh hmechhe tan a hranpain a nei bawk a ni. Heng course hrang hranga zirchhuak te hian All India Trade Test chu an hmachhawn leh thina chuta exam pass te chauh chu National/State Trade Certificate pek an ni thin. Heng certificate neia zirchhuak te hi India ram hmun hrang hrangah pawh a duh bikin, sawrkar leh private company/Industry te hna hmuh an awlsam phah bik hle a ni.
Heng ITI trade hrang hrangah te hian kumtin mi engemaw zat zirchhuakin sawrkarah te leh private ah te hna an hmuin, mahnia eizawng mi hlawhtling tam tak an awm tawh a ni. ITI atanga zirchhuak te hi an trade zirchhuah atanga mahni kea din tum tak takte chu sawrkar ah tanpuina (scheme) hrang hrang dil tur a awm thin bawk. Amaherawhchu he department hian ITI atanga zirchhuakte hi hna pek emaw zawn sak hi a bat leh tum ber chu a ni lova, A tum ber zawk chu thalaite mahnia enzawnna ngel nghet an neih theih nana trade hrang hrang zirtirna (training) pek a ni. Chubakah thalaite Industry lamah kawng kawhhmuh a, kaihhruai hi a ni Employment Exchange a in register thiamna neite chu an thiamna zawnga hnaruak a awm erawh chuan interview turin a ko mai thin a ni.
Industrial Training Institute, Aizawl ah hian trade hrang hrang 30 laiah training theih a ni a. Trade khatah hian Unit 2 te awmna a awm avangin Unit 41 lai a awm a ni. Chung Trade te, qualification ngai te, zir hun chhung te chu a hnuai ami ang hi a ni a, a course hi 1st August atanga tan a ni
