Aizawl the 9th May 2023: Labour Employment, Skill Development & Entrepreneurship (LESDE) Department buatsaih Mizoram Mega Job Fair chu Millenium Centre rooftop-ah vawiin khan Deputy Chief Minister Pu Tawnluia’n a hawng.
Hawnna inkhawm-ah hian Khuallian Pu Tawnluia chuan Mizo thalai lehkhathiam hna neilote tan Mizoram-a a vawikhat nana Job Fair buatsaih a ni chu lawmawm a ti hle a, buatsaihtu Department officials-te leh LESDE Department changtu Minister Pu Lalchhamdama Ralte chungah a lawm thu a sawi a ni.
Pu Tawnluia chuan LESDE Department chu fakin Department tenau anga lang si in a pawimawh hle a ni a ti a, hmasawnna duhawm tak thlen tu leh rahtha chhuah thei department a nih thu sawiin thalaite tana hmasialtu leh kawng sattu pawimawh tak a ni a ti. Thalai ten tangkai lehzuala an hman theih nan thawktute pawh thalai rilru pu a, hriatthiamna nena an department dawrtute lo dawngsawng fo turin a chah bawk.
Deputy Chief Minister chuan Mizoram-ah thalai lehkhathiam tam tak an awm thu tarlangin, an tuina leh theihna te hmang tangkai turin sawrkar hna in a daih tawk lo a ti a; sawrkar pawn lama hna tam takte chu dinchhuahpui tham a ni a, ei leh bar a intodelhna tur leh eizawnna kawng tha tak a ni tiin vawiin programme chu tangkai taka hmang turin kalkhawmte a fuih a ni.
Khuallian Pu Tawnluia chuan covid hripui leng avangin kum-2 chhung hna lak a khaihlak hnuah sawrkar in thalai te hmakhua ngaiin zawi zawi in recruitment a kalpui chho mek a ti a, amaherawhchu tun dinhmunah thalai hna neilo zawng zawng chan khawp a awmloh thu sawiin sorkar pawn lama hna ngelnghet (sustainable employment) hmu thei tura tan la turin kalkhawm thalaite a chah bawk. Minister chuan Placement Agency kalkhawmte chu chahin Mizoram thalai hna neilote chu dan in a phal chinah duhsak turin a ngen nghal bawk a ni. Minister chuan tunlai thalai-te chu an taima a, thawh hreh an nei tawh lo chu fakawm a ti hle a, an hma a hna chhawpchhuahte chu chhel taka thawk zel turin a fuih nghal bawk. Skill development hmalakna hrang hrangah theihtawp chhuah tlan chuan kum reiloteah thalai ten ram an siam danglam ngei theih a rin thu a sawi a, vawiin-a fair buatsaih chu thalaite hmasawnna leh changkanna, sum leh pai dehchhuahna kawnga kawng kawhhmuhtu a nih theih nan duhsakna a hlan nghal a ni.
Vawiin Mizoram Mega Job Fair hawnna inkhawm-ah hian LESDE Secretary Pu Lalramsanga’n lawmna thu sawiin hun a hawng a, LESDE Director Pi Angela Zothanpuii’n report tawi pein Dr. J.T. Vanlalngheta, Joint Labour Commissioner, LESDE Department in lawmthu sawiin hun a khar a ni.
Mizoram Mega Job Fair-ah hian LESDE Department chuan ram chhung leh pawna sector hrang hrang atangin company lian leh changtlung tak takte sawm khawmin chung company-te chuan Mizoram chhunga hna zawnglai te tan hnathawh tur a chhawpchhuah sak dawn a ni.
He Job Fair kaltlang hian hna zawnglai leh company-te hian hamthatna insiam tawnin, tualchhunga thalai hna neilo leh hna zawnglai te hnena hna nghelnghet leh rintlak zawk tualchhung, ram chhung leh ram pawna an lo hmuh theih nan hun remchang buatsaih a ni. He Job Fair hian May ni 9-10 2023 chhung awh dawnin Millenium Centre rooftop-ah thalai hna zawng mek te tan career guidance stall telin hawn a ni dawn a ni.
