16.09.2023 : Nimin ni 15th September, 2023 (Zirtawpni) khan Govt. ITI Aizawla zirlai zirchhuak mi 219 te pual in Convocation Programme hman a ni.
Govt. ITI Aizawl hian kumin (2023-24) hian zirlai mi 419 an nei mek a. Tun Result chhuak hnuhnung berah khan Overall Pass Percentage hi 98.2 % niin, Govt. ITI Mizoram din tirh atanga result that ber tum niin, India ram State hrang hrang zingah Govt. ITI Aizawl chu result nei tha zingah a tel a ni.
Convocation Programme vawi 2-naah hian Pu Vanlalhruaia Sailo, Principal Govt. ITI Aizawl chuan in lawmna thu sawiin, khuallian, Pu Lalramsanga Sailo, Secretary LESDE Department chuan, Mizorama ITI zirna in hma a sawn zel avang leh Mizo thalai ten thiam thil zir kawng a ke an pen nasa chu lawmawm a ti hle a. India ram Govt. ITI sang chuag zinga result nei tha pawl a an lang thei chu chhuanawm a tih thu a sawi bawk. Ram in hma a sawn zel theih nan leh thalaite thiam thil hmanga mahni kut kea ding thei tura hma an sawn zel theih nan ITI tih changtlun zel a pawimawh thu sawiin, kumina Engineering trade hrang hrang zirlai pass chhuak ten an result chhuah hmaa hna tha tak an hmu vek thei chu lawmawm a tih thu a sawi bawk.
Khuallian Secretary LESDE Department chuan zirchhuak mi 219 te hnenah Certificate hlanna hun a hmang a, a ti tha zual TOP 3 te, Ramnunsangi, Stenographer&Secretariat Assistant{English}(STENO), Jerry PB. Laltanpuia, Computer Programming Assistant(COPA) leh Ramengzauva, Computer Programming Assistant(COPA) te hnenah Award hlanna a nei bawk a ni.
Pi Angela Zothanpuii, Director, LESDE Department chuan Magazine a tlangzarh a. Hemi rual hian G20 India Presidency denchhena competition hrang hrang buatsaiha a ti tha zual T0P 3 te hnenah Certificate hlanna a nei a, Mizoramin Skills khawvela hma a sawn zel theihna atana zirlai kal chhuakte chuan pawimawhna lian tak an neih thu sawiin, an hlawhtlinnaah lawmthu a sawi a ni.
Government ITI Aizawlah hian Trade thar Solar Technician hawn belh niin, Drone Technology leh Artificial Inteligent course te hawn belh tura hmalak mek a ni a. Drone Technology bik zirchiang tur hian Government ITI Instructor pawhin training course a kal mek in, mamawhna a san a em avangin Electrician Trade Unit 1 hawn belh a ni bawk a ni.
ITI Convocation Programme vawi 2-naah hian zirchhuak mi 219 leh zirlai lut thar mi 419 te bakah ITI Instructor te leh LESDE Department Official ṭhahnem tak an tel thei a ni.
