2105/2023-2024
Aizawl, the 2nd October 2023: Vawiin khan Governor Dr Hari Babu Kambhampati chuan Raj Bhavan Secretariat leh Department of Commerce & industries te tangkawpin Mahatma Gandhi piancham lawmna denchhena a buatsaih, ni 3 awh, Gandhi Jayanti Exhibition chu Circular Lawn, Raj Bhavan-ah a duh a piang te tlawh theih turin a hawng a. He hunah hian Dr R.Lalthangliana, Minister, Commerce & Industries leh mi pawimawh dang te pawh an tel a ni.
Governor Dr Hari Babu Kambhampati chuan hawnna thuchah sawiin India Hnam Pa, Mahatma Gandhi zahna chibai a buk hmasa a. He Exhibition hi Mahatma Gandhi zirtirna zulin khawtuala kan thil siam leh dehchhuah te ngaihhlut inzirtirna bakah kan khawtuala sumdawng le kuthnathawktute chawikanna atana buatsaih a ni a ti.
Governor chuan chuan Mizoram ang state tenau zawkah hian Handloom industry, micro, mini leh medium business unit lam hawia kan entrepreneur ten hma an lak a fuh ber tih a sawi a. “Kan state a lian lova, mihring kan tlem bawk si avangin Industry lian pui pui din a remchang lo mai thei e. Mahse, kan tualchhunga tharchhuah leh inlamah kan lo siamchhuah theih apiang te hi hlawk takin sumah kan chantir thei a. He mi huanga eizawng te hi kan duhsak a, an thil siam te kan hlutsak a ngai a ni”, a ti. Tun tuma Raj Bhavan tual zawla Exhibition buatsaihah hian mi zawng zawng te rawn kal tura sawmin heng dawrte a thil zawrh te hi leisak theuh turin sawmna a siam bawk a ni.
Governor thusawi kimchang: https://dipr.mizoram.gov.in/post/speech-of-dr-hari-babu-kambhampati-honble-governorof-mizoram-on-the-occasion-of-inaugural-function-of-the-grand-gandhi-jayanti-exhibition-at-circular-lawn-raj-bhavan-on-02-october-2023
Dr R.Lalthangliana, Minister, Commerce & Industries chuan Governor hnenah state chhunga entrepreneur te tana hun pawimawh tak Raj Bhavan-ah a lo thlen sak avangin lawmthu a sawi a. He exhibition buatsaihna atan senso engmaw zat a rawn tum sak avangin Ministry of Textile chungah lawmthu a sawi bawk.
Commerce & Industries Minister chuan kan sumdawng te a bikin handloom leh handicraft huanga hmalatute chu an thilsiam te a rawn mawimam chho zela, belhchian a dawl chho telh telh nia a hriat thu sawiin tanla zual sauh sauh turin a fuih a. Mizo puan, kawr leh thawmhnaw te bakah handicraft huang kutthemthiamte thilsiam te chu a mawimam a, belhchian a dawl a nih phawt chuan a leituten sum tam zawk sengin an lei ngam reng a ni a ti.
Vawiina Governor in a hawn tak, Exhibition ang hi, Raj Bhavan in a buatsaih vawikhatna a ni a. He hunah hian a duh apiang te tan Raj Bhavan tlawh in Exhibition hi a chhim theih a ni. Tun tuma Exhibition-ah hian Dawr 62 a awm a, hengah te hian Handloom lam thil bakah kut themthiamna atanga siamchhuah thil tha tak tak te, food processing unit atanga siam ei tur chi hrang hrang te, food court te bakah PM Viswakarma Yojana ngaihven duh te tana Help Desk te leh Loan la duh te tana pan tur Help Desk te pawh chhawp chhuah a ni.
Programme hi Pi Florence Zotluangpuii, Director, Commerce & Industries-in buatsaih a nih dan leh a thil tum te sawiin tan a ni a. He he hunah hian Chief Secretary Dr Renu Sharma, Sawrkar hotulian te leh sawmbik mi pawimawh te an tel a ni. Hawnna program neih zawhah Governor leh Commerce & Industries Minister te chuan Dawr hrang hrang an tlawh kual nghal a ni.
