1485/2023-2024
Aizawl, the 14th August 2023 : India Independence vawi 77-na champha lawmna leh Azadi Ka Amrit Mahotsav kharna pualin Labour, Employment, Skill Development & Entrepreneurship Department chuan, “Youth Skills and Learning for a Transformative Future” tih thupui hmangin Walkathon For Skill Development, Vanapa Hall atanga Millenium Centre, Dawrpui thleng August 14, 2023, zing dar 6:00 AM khan buatsaih a ni.
Walkathon hmanpuitu, Pu Zothantluanga, MLA, Man Power Development Board, Vice Chairman chuan kalkhawmte hnenah, "India ramah hian thalai kum 25 hnuai lam kan tam ber a, hna thawk thei rual zingah za a sawm(10%) te chauh hi employable skills nei an ni. Khawvel ram changkang zawk kan tih te hi ram leilung hausakna ngah ber ber an ni bik lova, an thalai te skills lamah an sang em em a, chu chuan khawvela ram hausa leh thiltitheiah a awm tir mek a ni. Mizoramah pawh mahni lehkha zirna lama a sang ber thleng zir zo tawh, mahse sawrkar hnuaiah emaw an lehkha zir thiam ang thawh tur hmu mai lo tam tak kan awm a. Hei vang hian kan zirna kalpui chungah skills lama hma kan sawn a, thiam thil zirna hrang hrang kan bawh hi a tul takzet a, vawiina zirlai lo kalkhawm te pawh kan lehkha zirna kalpui chunga thiam thil(Skill) zir ngai pawimawh tur leh hmasawn theuh turin ka sawm che u a ni." tiin Walkathon-a kal turte a vai liam nghal a ni.
He programme kaihruaitu, Pu Lalramsanga Sailo, Secretary, LESDE Department pawhin kalkhawm te hnenah, 'He programme hi India Independence day lawmna pual leh Azadi Ka Amrit Mahotsav kharna pual leh G20 pual a nih thu a sawi a, Mizo thalai ten kan Zirna (Education) bakah Thiam thil (Skills) zirna ngaih pawimawh hi hmabak eng zawk leh tha zawk kan neih na tur a ni a ti a, he lama thawktu thalaite tana ding sawrkar Department LESDE chu hmang tangkai leh zual turin kalkhawm te a sawm a ni.
Walkathon kharna hi Millenium Centre kawt, Dawrpuiah hman niin, he hunah hian LESDE Department Director, Pi Angela Zothanpuii chuan, zirlai lo kalkhawmte hnenah lawmthu sawina neiin zirlaite chu kumin chhunga an zirna baka thiam thil(skill) pakhat theuh tal nei thar turin a sawm a, Thiam thil zirna kawngah anmahni pui turin eng lai pawhin LESDE Department a awm thu sawiin, neitu taka hmang tangkai tura sawm in Walkathon hun a ti tawp a ni.
Walkathon for Skill Development hi LESDE Department in kumin hi tum hnih a buatsaihna a ni a, He hunah hian School Pahnih, Mizoram Institute of Comprehensive Education (MICE) leh NEUHOF atangin zirlai 100 an tel a. College pali, Govt. Hrangbana College, Govt. Aizawl College, Govt. Aizawl West College leh ICFAI University atangin zirlai mi 120 kalin, Mizoram Building & Others Construction Workers Welfare Board (MBOCWWB) hnuaia Training Provider, Mission Foundation Movement (MFM), Vocational School of Education (VSE), Accent Plus, VAKIRIA Computerised Embroidery te atangin mi 100 leh Medhavi PMKK Centre atanga mi 30 te nen an vaiin zirlai mi 350 leh Department Officials ten Walkathon hun hi an hmang thei a ni.
Attachment
