3615/2024-2025
Aizawl, 2nd December 2024: Vawiin khan International Labour Organization (ILO) hotu Pu Satoski Sasaki, Dy. Director leh Pi Divya Verma, Sr. Programme Officer ten Mizoram tlawhin, Labour, Employment, Skill Development & Entrepreneurship (LESDE) Department hotu ten an lo dawngsawng a ni.
ILO Officials te lo lawmna hun hi Secretariat Conference Hall-ah hman niin Pu Lalnghinglova Hmar, Minister, LESDE Department chuan a kaihruai a, Mizoram Thalaite leh kut hnathawktute tana hmalakna duhawm tak thlen thei tura International Labour Organization (ILO) aiawh in an rawn tlawh chu lawmawm a tiin thawhhona tha neih pui ngei a inhuam thu a sawi a. He hunah hian Pu Satoski Sasaki, Dy. Director chuan International Labour Organization thil tum leh an pawl hmalakna sawifiahin, ILO hi kum 1919 atanga din tan niin tunah hian kum 105 hmel a hmu mek a, Kum 1946 atang khan UN special agency pakhat niin tunah hian ram 187 member an awm mek a. Geneva-ah Headquarters neiin ram 40-ah field Office nei mekin ILO hian khawvel puma kut hnathawktute dinhmun chawisan leh venhimna kawngah hma a la mek a, hmalakna kal zelah Mizoram nena thawhdunna tha a awm theih nana lo kal an nih thu a sawi a ni. Pi Divya Verma, Sr. Programme Officer pawhin ILO hnuaia Programme leh project an kalpui hrang hrangte sawifiahin Mizoram tana hmalakna awm thei apiangah kawng hawnsak an inhuam thu a sawi bawk.
He inlawmna inkhawm tawiah hian Pu Lalmalsawma Pachuau, Secretary, LESDE Department pawhin thusawiin Mizoram thalaite tan Care & Hospitality Sector hnuaia hnathawk tur mamawhna a san dan te sawiin he sector hnuaiah hian hmeichhia ten dinhmun zau tak an chan thu te a sawi a, State Flagship Programme Handholding Policy (Banakaih) hnuaiah hnathawktute tana sawrkarin ruahmanna a siamte a sawilang bawk. Pu John Tanpuia, Director, LESDE Department chuan Mizoram hnathawktute dinhmun tlangpui leh hmalakna hrang hrangte sawifiahna hun a hmang a, Pi V Lalmuanpuii, Secretary, Mizoram Youth Commission(MYC) chuan MYC hmalak mekna leh hmachhawp hrang hrangte a tarlang a ni.
He hun hman zawh hian ILO official-te leh LESDE Department hotute LESDE Directorate Committee Room-ah hmalakna kalpui dan tur atana inkawmkhawmna hun hman chhunzawm a ni a. Kumthar lamah Round Table meeting Department-te nen buatsaih an tum thu leh Entrepreneurship lama hmalak nan Officials tan Training of Trainers buatsaih an tum thu an sawi a, The Mizoram Private Placement Bill tun dinhmuna buatsaih mek pawh en ho pui an inhuam thu an sawi lang bawk a ni. Hun hman zawhin MYC hmunte tlawhin hmalakna kalpui dan tur hrang hrangte sawiho in hun an hmang a, ILO Officials te hian naktip December Ni 4, 2024-ah Aizawl chhuahsanin Delhi lam an pan leh dawn a ni.
