Aizawl the 23rd January, 2024: Labour, Employment, Skill Development & Entrepreneurship Department buatsaih ni thum awh ‘KAWTCHHUAH – 2024’ (2nd Mizoram Startup Competition for Govt. ITI pass-outs) chu vawiin khan Govt. Aizawl ITI Auditorium-ah hawnna neih a ni.

He hawnna inkhawma khuallian Pu Lalramsanga Sailo, Secretary, LESDE Department chuan thusawiin, LESDE Department chuan KAWTCHHUAH 2024 hian mahni kutkawih leh them thiamna hmanga eizawnna bultanna chawilar a tum ber a, ITI atanga zir chhuak tawhte, an kal zelna tur kawng sah kuakpui a, tiphurtu leh chona thar petu atan he programme hi duan a ni a ti. He intihsiakna hi Ministry of Skill Development & Entrepreneurship (MSDE) hnuaia Skill Strengthening For Industrial Value Enhancement (STRIVE) project hnuai atanga buatsaih niin. Kan sawrkarin Startup programme a ngai pawimawh a, hemi atan hian Mizoram Startup Mission pawh dinin he hmalakna tih hlawhtlin hi LESDE Department mawhphurhna a ni a ti bawk.

Hun kaihruaitu Pi Angela Zothanpuii, Director, LESDE Department chuan Intihsiakna tel turte inhmel hriattirna neiin, Intihsiakna ni 3 chhungin theihtawp chhuah a, lawmman hmu ngei tura ṭan la turin a fuih a, LESDE Department chuan ITI zirchhuakte hmakhua ngaihtuah sak zel a tum thu leh, tun aia nasa leh zuala ITI zirchhuak te Entrepreneur ṭha an nih theih nana hmalak chhunzawm a nih zel tur thu a sawi bawk a ni.

KAWTCHHUAH-2024 hi Govt. ITI pass chhuak tawhte tana hmalakna bul tanna tura business plan nei tha thlanchhuah tur niin, he intihsiakna a tel tur hian application 44 a lut khawm a. Heta tang hian mi 30 ten Intihsiakna hmachhawn dawn a ni.

KAWTCHHUAH-2024 hi vawiin ni 23.01.2024 atang tan niin, naktip ni 25.01.2024 hian LESDE Department changtu Minister, Pu Lalnghinglova Hmar in kharna hun a hmanpui dawn a ni.