Pu Lalnghinglova Hmar, Minister, Labour, Employment, Skill Development & Entrepreneurship (LESDE) Department chuan zirlaiten zirna leh IT lama thiamna an neih theihna tur Skill Lab chu Govt. K.M. High School, Dawrpui Vengtharah Ni 14 November, 2025 khan a hawng.
Skill Lab hi SANKALP Scheme hnuaiah district 11 a school 12 ah din niin, Minister chuan Govt K.M. High School atang hian a vaiin a hawng a ni. He hun hi Pu John Tanpuia, Director, LESDE Department chuan a kaihruai a ni.
Minister Pu Lalnghinglova Hmar chuan khawvel thiamna inher danglam zel mila zirlaite pawh an inzir zel a pawimawh thu a sawi a. Khawvelin hma a sawn zela, thiamna thar lo chhuakte thiam ve lo chu kalsan an ni dawn tih sawiin, zirlaite chuan Skill Lab hawn thar chu IT lam an hmelhriata an thiam ve theihna tur leh hmang tangkai turin a chah.
Minister chuan lehkha thiamna hmanga hna hmuh vek theih a nih loh avangin eizawnna tlaka thiamthil (skill) neih a pawimawh thu a sawi a. Chumi kawnga thalaite pui turin ITI-ahte skill hrang hrang, drone hman dan thlengin zir theih a ni a ti.
LESDE Department chuan Mizoram chhunga district 11 huamchhunga sawrkar school 12-ah Skill Lab te hi a din a, zirlai 2,413 velin an hlawkpui theih beisei a ni. Skill Lab pakhat ah Computer 10, Printer 10, White Board, Internet Connection ( La neilo te tan), Dawhkan leh Chair 10 te dah bakah sikul zawng zawngah Skill Lab siam nan hian room awm sa te chu thawmthat (renovate) vek bawk a ni.
