3240/2023-2024
Aizawl, the 5th of January, 2024: Vawiin khan Pu Lalnghinglova Hmar, Minister of State, LESDE, Sports & Youth Services leh Excise & Narcotics Department changtu chuan a department chante kumthar inhlantharna hun a hmanpui.
Vawiin chawhma dar 10:00 a Commissionerate of Excise & Narcotics Conference Hall-a kumthar inhlantharna hunah Pu Lalnghinglova Hmar, Minister of State chuan thu sawiin, zu leh ruihhlo tihrêm leh khuahkhirh kawngah Excise & Narcotics Department chungah Mizoram mipuiin rinna an nghat a ni a ti a. Mipuiin an beisei ang ngeia hmasawnna leh hlawhtlinna an thlen theih nan kalphung tha zawk neih a tul tih sawiin, thawktute chu duty hun chhunga zu leh ruihhlo laka fihlim tura invawng a, sim ngai a awm chuan sim tura tan la turin a fuih a. Resource neih sa hmanga tha taka thawk thei tura inringtawk turin thawktute chu a chah a. Inkaihhruaina (manual) awmsa angin, post ngaia mi pakhat awm rei lutuk awm lo tura kalphung siamthat a nih tur thu a sawi bawk.
Kumthar inhlantharna programme hi Pu Peter Zohmingthanga, Joint Commissioner of Excise & Narcotics (Enf) in a kaihruai a, Pu Z. Lalhmangaiha, Commissioner of Excise & Narcotics-in kalkhawmte lawmna thu a sawi a. Pi C. Lalmalsawmi, LDC in hunserh a hmang a ni.
Vawiin vek chawhma dar 11:00 a LESDE Conference Hall-a LESDE Directorate inhlantharna programme chu Minister Pu Lalnghinglova Hmar chuan a hmanpui a. Thawktute chu hun vawng dika hmang tha tur leh, hnathawh hun chhunga theihtawp chhuah thin turin a chah a. Department hnuaia scheme hrang hranga thawkte chu intihrang lo leh inlungrual taka thawkho zel turin a sawm a ni. LESDE Department chu theihna (potential) sâng tak nei, Department pawimawh tak a ni tih sawiin, Sawrkar leh mipui tan tangkai zawk leh zau zawka hma lak theih dan ngaihtuah thin tur leh, midang tihdan tha zawk a awm chuan entawn hreh lo turin a chah a ni.
LESDE Directorate inhlantharna hi Dr. J.T. Vanlalngheta, Jt. Labour Commissioner-in a kaihruai a. Pi Angela Zothanpuii, Director, LESDE Department-in kalkhawmte lawmna thu sawiin, Pu Lalmuanawma, Dy. Director-in hunserh a hmang a ni.
Pu Lalnghinglova Hmar, Minister of State hian vawiin chawhnu dar 2:00 a Sports & Youth Directorate Conference Hall-a kumthar inhlantharna programme a hmanpui bawk a. Sports-ah result tha neih a, medal lak tam chu Sawrkar-in a ngaihpawimawh ber a ni dawn tih sawiin, chumi tur chuan Sports & Youth Services hnuaia wing/branch hrang hrangte inpawhtlang leh lungrual taka thawk hova, inthlahdah lova tang mar turin a fuih a. Training-na tur hmunhma tha tak tak awmsate chu tangkai taka hman a tul tih sawiin, sports kaihhnawih scheme hrang hrangte chu mimal hlawk nana hman tum lo turin thawktute a chah a. Sawrkar hnathawk chu hun vawng dik leh hmang tha turin a beisei tih sawiin, chhiatni thatni, kohhran leh khawtlanga inhman dan thlengin chintawk neih a pawimawh thu a sawi bawk.
SYS Department inhlantharna hun hi Pu Lalnunhlua, Director, Sports & Youth Services-in a kaihruai a. He hunah hian SYS Directorate bakah Mizoram State Sports Council (MSSC), NCC, Adventure Sports bakah Lunglei, Kolasib leh Champhai District Sports Office-a thawkte an tel a ni.
