3361/2022-2023
Aizawl 25th January 2023: Vawiin khan Mizo ṭhalai Japan rama Nurse hnathawk tur mi 14 te chu NSDC-I tumsaka Delhi-a Japanese tawng thla 9 chhung zir turin Pu Lalchhandama Ralte, Minister, Labour, Employment, Skill Development & Entrepreneurship Department chuan a vai liam a ni.
Japan leh India sawrkarin thawhhona thuthlung an siam angin Japan rama Nursing Care hna thawk tur thawn luh hna hi National Skill Development Council-International (NSDC-I) chuan a kalpui a, India rama a pilot programme atan Nurse 50 thawn luh phawt a tum a ni. LESDE Department hmalaknain Mizo ṭhalai Nurse hna thawk tur a ṭum khat nan mi 6 kaltir tawh niin, vawiin khan a tum hnih nan mi 14 kaltir leh an ni.
He programme hi Pu Lalramsanga Sailo, Secretary, LESDE Department chuan kaihruaiin Mizo ṭhalai te ram pawna hnathawk thei tur hian theihna sang tak kan nei a, LESDE Department pawhin ṭhalaite eizawnna kawng zawnpui turin theih tawp a chhuah zel dawn a ni a ti. Khuallian, Pu Lalchhandama Ralte, Minister, LESDE Department chuan, Japan rama Nurse hnathawk tura kal turte chu Mizoram tan Ambassador an nih thu leh, Mizo thalai tam takte tan eizawnna kawng sialtu pawimawh tak an nih thu sawiin rinawm leh taima taka thawk turin a fuih a, Kristian kan nih ang ngeiin ring lo mite pawhin kan hnathawh leh kan nunah Pathian ringtu kan nihzia an hmuh ngei theihna turin tawngtaia Pathian au fo turin a chah bawk a ni. He hunah hian Pi Golda Dell Zohmangaihi, Core Faculty, ATI pawhin kal turte tana tangkai tur hrang hrang leh fuihna thu a sawi a, Pi Angela Zothanpuii, Director, LESDE Department chuan Training nei tura kal turte an training dan tur chungchang leh hriattur pawimawhte sawiin he hun hmang tura lo kal zawng zawngte hnenah lawmthu a sawi a, he hunah hian Pi Smita Chetia Talukdar, Regional Manager(NE) leh Pu Masotmi Zimik, Engagement Officer, NSDC lam an tel bawk a ni.
Vawiina thlah liam tak mi 14 te hian thla 9 chhung Training an neih zawhah an thawhna tur biak fel sa hmun te Sawrkar-in a enfelsak zawhah Japan ramah hnathawk turin kaltir an ni ang a, an kalna senso leh tuldang hi an thawhna tur ten an tumsak vek dawn a ni. Mizoram atanga Japan rama Nurse hnathawk tur mi 20 thawnchhuah tawh bakah hian Mizo Thalai ramdanga hnathawhna rintlaka thawk thei turin LESDE Department hian hma a la chhunzawm zel dawn a ni.
