21/2023-2024
3rd April, 2023 : Vawiin khan Mizorama Vocational Training lama thuneitu sang ber, Mizoram Council For Vocational Training (MCVT) chu an Chairman, Pu Lalchhandama Ralte, Minister, LESDE Department hovin a Office Chamber-ah an thukhawm.
Meeting-ah hian thu pawimawh tak tak ngaihtuah a ni a, chung zingah chuan Mizoram sawrkar Notification 2018-a Mizoram State Policy on Skills & Entrepreneurship Development hnena thuneihna a pek angin, Mizoram Sawrkar hnuaia Skilling Activities Department hrang hrangin a kalpui mek chu huang khata kalpui (Convergence) dan tur sawiho niin Department hrang hrangte Skilling Activities & Training hnuaia information Data an neih hrang hrangte chu LESDE Department in Skill Mizoram Portal a buatsaihah dah luh vek nise a ti a. Hei hian Mizorama Skill Training kawnga hmasawnna leh hmalakhna changtlung zawk leh Mizo thalaite tana awlsam taka information an dawn theih na hmanrua a nih beisei a ni. MCVT hi State sawrkar hnuaia State Skill Training scheme hrang hrang kalpui mekah Assessing & Certifying Body atana hman nise, hemi atana tul leh pawimawh hrang hrangte a rang lama buatsaih nise an ti bawk.
Hei bakah hian Govt. ITI hrang hrang, Aizawl, Lunglei leh Siaha-a zirlai kal tur thalaite tana tangkai zawk a nih beiseiin ITI Admission Fee, Hostel Fee leh Examination fee te ennawna siamrem nghal a ni a. Examination buatsaihna senso hrang hrangte pawh ennawn niin siamrem nghal a ni bawk. Meeting chuan, Mizoram Council For Vocational Training (MCVT) in State sawrkar atanga Grant-in-Aid fund atana Rs. 20 lakh a hmuh thin chu State Sawrkarah tihpun a nih theih nana hmalak nise an ti bawk a ni.
Chairman, Pu Lalchhandama Ralte chuan, member-te chu Mizo Thalai te thiam thil zir kawnga hma kan sawn zual zel theihna tura ngaihtuahna thar senga, tan la zel turin a sawm a. Department hrang hrang hnuaia Skill Training leh hmalakna hrang hrang kalpui mek pawh chak zawka kalpui turin a chah a ni.
Meeting-ah hian LESDE Department Secretary Pu Lalramsanga Sailo, Higher & Technical Education Secretary Pu Lalramnghaka, LESDE Director Pi Angela Zothanpuii leh LESDE Officers dangte bakah MzSRLM CEO Pi Lalchhandami leh Pu K Lalhmingthanga, President, Mizoram Chamber of Commerce & Industries te an tel a ni.
