Aizawl, 10th May, 2023 : Labour, Employment, Skill Development & Entrepreneurship (LESDE) Department buatsaih Mizoram Mega Job Fair (National and International), 2023, Millenium Centre chunga neih chu vawin khan hlawhtling taka khar a ni.

He Fair hi May ni 9, 2023 khan Pu Tawnluia Deputy CM in a hawng a, Dy. CM chuan, a vawikhatna atan he Job Fair buatsaih a ni hi Mizo thalaite tan thil tangkai tak leh hlawkthlak tak a nih thu a sawi a, Covid vanga kum hnih chhung zet sawrkarin hna a lak mumal theih tawh loh hnuah hetiang a LESDE Dept. in thalaite tan hun remchang a siamsak hi lawmawm a tih thu a sawi, a ni.

Mega Job Fair-ah hian rampawn leh ramchhhunga company hrang hrang ten heng sector: Financial Institutions, Banking, Healthcare, Service, Automobile, IT, FMCE, Tourism and Hospitality, Beauty & Wellness etc, sawm khawmin mizo thalai hna zawnglaite tan hnathawh tur 1800 chuang an rawn chhawpchhuak a, Fair tlawhtu register tawh mi 2110 an awm tawh a, a hmuna hna hmu nghal (on the job placement) mi 50 vel an awm a, hna hmu thei maia chiang tawh an ni. Employer te hnena in register, interview leh document ensak hmabak hi tlai dar 5 thleng khan mi thahnem tak an la awm bawk a ni.

LESDE department hi Mizoram Sawrkar hnuaia thalaite tha tih chakna (Youth empowerment) lama hmalatu a ni a,thalaite eizawnna tlak thiamna pek (Skill Training) te, Skill Competition, Innovation leh Entrepreneurship Fair leh Competition an buatsaih thin a, Mega Job Fair  pawh hi thalai eizawnna zawng mek te tana buatsaih a ni. Kumin 2023 chhung hian Mizo thalaite tana hmasawnna tur programme hrang hrang buatsaih tur hmachhawp an nei mek bawk a ni.