463/2024-2025
Aizawl the 13th May, 2024 : Labour, Employment, Skill Development and Entrepreneurship Department hmalaknain Mizoram Team member 16-te chu trade sawmparuk a India Skills National Competition, New Delhi leh Karnataka State-a neih tura intihsiakna hmachhawn turin Pu Lalmalsawma Pachuau, Secretary, LESDE Dept. chuan vawiin khan a vailiam.
LESDE Secretary Pu Lalmalsawma Pachuau chuan intihsiaknaa tel turte lawmna leh duhsakna thuchah sawiin an kalna hmun apiangah Mizoram aiawh an ni tih hre reng turin leh, an chetzia leh nungchang thlenga ram tana mawi taka awm turin a fuih a. He intihsiakna hi India ram mai bakah khawvel huap pawha Mizo hnam ziarang, nihna leh themthiamna phochhuahna hmanruaa chantir ngei turin a fuih a ni.
Indiaskills 2024, National Competition-ah hian State hrang hrang atangin mi 500 chuang an tling a, trade hrang hrang 63 hmangin an intihsiak dawn a ni. Mizo thalai tel turte hi Bakery, Beauty Therapy, Cooking, Drone Film Making, Electronics, Electrical Installation, Fashion Technology, Floristry, Hair Dressing, Health & Social Care, IT Software Solution for Business, Pattisserie & Confectionery, Painting & Decoration, Plumbing & Heating, Shoe Making, leh Visual Merchandising trade hmanga intihsiaknaah an tel dawn a. He intihsiakna paltlangte hian WorldSkills 2024, Lyon, France-a kumin September thla a neih turah India aiawhin intihsiakna an hmachhawn leh dawn a ni.
He Flag off programme kaihruaitu Pi Angela Zothanpuii, Director, LESDE Dept. chuan Mizoram aiawh a chhuakturte inhmel hriattirna hun hmangin, Mizoram aiawha kal turte duhsakna a hlan a, Mizoram hminga kal tur an nih angin theihtawp chhuah turin a chah bawk a ni.
Mizoram Team-te hi LESDE Department Officials paruk ten an hruai a. Intihsiakna hi May 14 – 16, 2024 chhunga neihtur niin, Delhi leh Karnataka State ten an inthlen tawm dawn a ni.
