783/2023-2024
Lunglei the 13th June, 2023 - Vawiin khan Dr. Vanlaltanpuia, MYC Chairman leh Lunglei North bialtu MLA ni bawk chuan Zotlang Higher Secondary School, Lunglei building thar a hawng a ni.
Dr. Vanlaltanpuia chuan Zotlang Higher Secondary School building thar tha tak hawn theiha ruahman fel ani chu lawmawm a tih thu sawiin School Education Minister Pu Lalchhandama Ralte chungah lawmthu a sawi a. Khawvel changkang chho zelah Mizo thalaite pawh kawng hrang hrangah hma kan sawn nasa hle a ni tiin, incheina leh pawn lam ringawta changkang lova, zirna leh thiamna, mahni talent hman tangkaina kawngah te pawh hma sawn zela, State dang thalaite el pha thei tura tan kan lak a tul a ni, a ti a. Zirna lamah State dangte nen khaikhin in hmasawnna tur nasa tak kan nei a ni tiin kan State leh kan hnam hmasawn zelna turin zirlaite chu thahnemngaia theihtawp chhuah turin a fuih a. Mimal tan a tha a, chhungkaw tan, khawtlang tan, ram leh hnam tan zirna tluka tha hi a awm lo a ni tiin, Zirtirtute pawhin zirlaite career in sial thiam a ngai a, zirlaite pawhin thahnemngai taka inpumpekna nena in zir a ngai a ni, a ti bawk.
He hun hi Pu V Lalrinzuala, Principal, Zotlang HSS in kaihruaiin Bialtu Pastor Rev. Joseph Vanlalruata'n hunserh hmanna a nei a. Pu R. Pazawna Vice Chairman, Managing Board Zotlang HSS chuan lawmthu sawiin hun a khar a ni.
Attachment
