Aizawl the 20th May, 2025: India hmarchhak state thalaite’n eizawnna tlak thiamna neihna kawnga peng pawimawh tak - Apprenticeship Training an neihna kawnga a bik taka buatsaih “Pilot Initiative for Special Intervention for Promotion of Apprenticeship in North Eastern Region (NER)” chu ATI Auditorium, MINECO-ah Mizoram Chief Minister Pu Lalduhoma leh Union Minister of State for Skill Development and Entrepreneurship Pu Jayant Chaudhary ten a rualin an hawng.
He scheme hnuaiah hian apprenticeship training nei mek ten sawrkar atanga stipend thlatin Cheng 1500 an dawn thin bakah Cheng 1500 dang chu PM-NAPS kaltlangin an dawn belh thei tawh dawn a ni.
He hunah hian Chief Minister Pu Lalduhoma chuan thu sawiin Mizoramin skill development leh entrpreneurship lama hma a lak mekna pawh a cho phur hle ani ti in, Mizo thalaite India ram pum huap pawha an duai bikloh zia sawiin, zirna atana ruhrel tha an neih theih chuan Mizoram mai nilovin, India ram economic hmasawnna kawnga hmahruaitu leh thawhhlawk thei tak an nih theih thu a sawi.
Union Minister of State for Skill Development and Entrepreneurship Pu Jayant Chaudhary pawhin India hmarchhakah hian talent a awm bakah thalaiten theihna (potential) sang tak an nei tih India sawrkarin a hriat thu leh chung thalaite chu cho chhuah a tumna kawnga hmalakna anih thu sawiin Prime minister pawhin a ngai pawh hle a ni a ti a, amah ngei pawhin he hmalakna hi uluk taka a vil reng dawn thu leh a regular taka review meeting neih a nih thin tur thu a sawi
He scheme hawnna inkhawmah hian Home Minister Pu K. Sapdanga, LESDE Minister Pu Lalnghinglova Hmar, Nagaland MLA Moatoshi Lungkumer, Advisor, Labour, Employment & Skill Development ni bawk bakah MSDE leh LESDE officials te leh hmarchhak state hrang hrang atangin mi pawimawh thahnem tak an tel ani.
