Labour, Employment, Skill Development & Entrepreneurship (LESDE) Department chuan hnathawktu te leh kan ram thalai te tan kawng hrang hrang; Labour Laws, Employment, Skill Development leh Entrepreneurship lamah nasa takin hma a la mek a, Department hmalakna kal zelah May ni 9 leh 10, 2023 hian Millennium Centre Roof Top ah Mizoram Mega Job Fair a buatsaih dawn a ni.
Mizoram Mega Job Fair ah hian LESDE Department chuan ram chhung leh pawna sector hrang hrang atangin company lian leh changtlung tak takte sawm khawmin chung company te chuan Mizoram chhunga hna zawnglai te tan hnathawh tur a chhawpchhuah sak dawn a ni.
He Job Fair kaltlang hian hna zawnglai leh company te hian hamthatna insiam tawnin, tualchhunga thalai hna neilo leh hna zawnglai te hnena hna nghelnghet leh rintlak zawk tualchhung, ram chhung leh ram pawna an lo hmuh theih nan hun remchang buatsaih a ni dawn.
He Job Fair a company rawn tel tur thlan chhuah thu ah hian tehna fung mumal tak hman a ni a. Company te an rintlak dan te, an theihna te leh an changtlunna te hi LESDE Department hian uluk taka a enfiah hnu ah thlan chhuah chauh an ni. Tin, an registration chungchang thlenga mumal taka enfiah thlap vek an ni. He fair ah hian ram pawn leh ram chhunga Company hrang hrang ten heng sector; Financial Institutions, Banking, Healthcare, Services, Automobile, IT, FMCG, Tourism & Hospitality, Beauty & Wellness etc. ah te hian hnathawk tur a chhawpchhuah sak dawn a. Hna zawngtu thiamthil bik nei leh nei lemlo te tan pawh a chhawrtu tur te duhzawng mi an nih chuan hna an hmu thei dawn a ni.
He Fair ah hian Company rawn tel zawng zawng te hian stall hranpa an nei theuh dawn a, chutah chuan hna zawngtu ten an qualification leh an tuina milin an stall hrang hrang te hi an va dawr thei dawn a ni. Tin, heng Company te leh hna zawngtu te hi an inhmuhrem theih chuan a hmun veka hna pek nghal theih an ni dawn bawk a ni.
Sd/-
LALRAMSANGA SAILO
Secretary to the Government of Mizoram,
Labour, Employment, Skill Development and Entrepreneurship Department,
Mizoram, Aizawl.
