PRESS RELEASE
Ni 7.7.2023 (Nilaini) chawhnu dar 3:30 pm khan Chief Secretary Pi Renu Sharma, IAS, kaihhruaina in Chief Secretary Conference hall-ah Mizoram Employees' State Insurance Society (MESIS) Governing Body meeting neih a ni a, Mizoram pawn atangin Regional Director, ESIC North-East Region leh State Medical Officer, ESIC Regional Office, Guwahati te pawh an rawn tel a ni.
Pu Lalramsanga Sailo, IRS, Secretary, LESDE Department chuan member te lo lawmin MESIS chungchang report hrang hrang a pe. He meeting ah hian MESIS hmalakna leh hmachhawp hrang hrangte sawiho a ni. Central ESI Branch Office, Aizawl atangin Asst. Director Pu David Lalfakzualan report a pe a, State ESI lam atangin Pi Angela Zothanpuii, Director, LESDE/ Administrative Medical Officer (AMO) in Powerpoint Presentation pe in ESI Scheme sawifiahin he scheme hnathawh hrang hrangte a sawifiah. Pi Renu Sharma, Chief Secretary chuan mizo mipuite ESI Scheme tangkai taka hmang turin a chah bawk a ni.
ESI Scheme hi private hnuaia thawkte hamthatna atan India Sawrkarin kum 1948 khan a din a, he scheme hnuaia inziak lutte leh an chhungten damlohna, naupai leh nau neih chungchangah te, hnathawhna avanga ramtuileilohna leh thihna hial tawh thlenga hamthatna an dawn theihna atana duan a ni. He Scheme hnuaiah hian sumdawnna hmun eng pawh – hotel, thingpui dawr, cinema hall, chanchinbu chhutna hmun, dawr, zirna in, damdawiin leh a dangte, mi 10 aia tlem lo hnathawktu awmna te an in register vek tur a ni. Heng hmuna thawk, thla khata cheng 21,000/- aia tam lo hlawhte chuan ESI Act hnuaiah hian hamthatna hrang hrang an dawng thei a ni.
ESI Scheme hnuaia in ziak lutte hian hnathawktu (Employee) in a hlawh atanga 0.75% leh a chhawrtu (Employer) in hnathawktu hlawh atanga 3.25% thla tin a chhun luh a ngai a. Hnathawktu, ni khata cheng 137/- hlawh tling lote chu hnathawktu hlawh atanga pek tur 0.75% hi chhun luh ve a ngai lo a ni.
ESI Act 1948, Section 46 in a sawi angin ESI Scheme hnuaia hamthatna dawn theih te chu hengte hi an ni-
- Medical Benefits
- Sickness Benefits
- Maternity Benefits
- Disablement Benefits
- Dependent Benefits
- Funeral Expenses
- Rajiv Gandhi Shramik Kalyan Yojona
- Pension te tan Medical Care
Tun dinhmunah hian Mizoramah ESI Scheme hnuaiah hnathawk mi 4006 leh establishment/unit 324 an in ziaklut tawh a ni.
Sd/-
ANGELA ZOTHANPUII
Director
Labour, Employment, Skill Development & Entrepreneurship Department
Mizoram, Aizawl.
