3420/2022-2023
Aizawl the 31st January 2023 : Vawiin khan LESDE Minister Pu Lalchhandama Ralte chuan a office chamber-ah Employment Exchange (EmpEx) Portal a hawng.

Minister chuan he hawnna hunah hian thusawiin țhalai hna zawngte tan Employment Exchange (EmpEx) Portal hawn a lo ni ta chu lawmawm a tih thu a sawi a. Sorkar department bakah sorkar hnuaia corporation zawng zawngten an hman țangkai tura hmalak zel țul a tih thu a sawi bawk. LESDE department-in skill Development-ah nasa takin hna a thawk a, India mai ni lo, khawvel huap pawha phochhuah tlakin hna a thawk a, entrepreneurship lamah pawh he department hmalakna hi a ropui hle a ni a ti. Minister chuan Mizoram Youth Commission-in hnathawh tur neite leh thawk duh te tana hman tur portal a lo siam tawh a, tangkai taka hman a lo ni tawh tih sawiin tunah hian portal changtlung zawk siam a lo ni leh ta hi ram tan a lawmawm hle a, țhalai hnazawng mekten an hlawkpui dawn a ni a ti.

Pu Lalramsanga Sailo, Secretary  LESDE pawhin he hunah hian thu a sawi a, hnathawh tur chi hrang hrang hi awm mahse, tarlanna a darsarh a, hna zawngtute tan hmuh mai a harsa țhin a, tunah erawh chuan Employment Exchange Portal ațangin hmuh mai theih a ni dawn a, țhalai hna zawngte tan hna dil tur hriat zung zung a awlsam tawh dawn a ni a ti.

Pi Angela Zothanpuii, Director, LESDE kaihhruai hawnna hunah hian Pu Isaac Zothanpuia, Project Manager, MSeGS pawhin thu a sawi a, Portal hman țangkai theih dan chi hrang hrang sawiin Employment Registration, Registration renew, hnaruak post apianga notification, skill labour te tan hna zawnna a ni dawn a, employment news a en theih dawn a, hnathawh tur nei tan awlsam takin hnaruak a post theih a, employment registration card te chu Digilocker ațanga download theih tura thlunzawm a ni tih te a sawi a ni.

Employment Exchange (EmpEx) Portal hi ICT MSeGS nen țangkawpa siam a  ni. Hawnna hunah hian LESDE Secretary, Director, Joint Labour Commissioner te leh Department officer te an tel hlawm a ni.

Attachment:-