1312/2023-2024
Aizawl, the 29th July 2023: Core Committee on Mission Chhanchhuahna (Alternative Income Generation Programme against Illicit Alcohol Manufacturing for Rangvamual and Phunchawng) atana thil tul leh ruahmanna neih sa te chu kalpui chhunzawm a ni a. He hmalakna kal zelah nimin 28th July 2023 khan Rangvamual Local Council House leh Phunchawng Presbyterian Kohhran Naupang Sunday School Hall-ah inzirtirna hun buatsaih a ni a, Help Desk siam a ni bawk.
He hunah hian, 19th July 2023-a Aizawl District Bawrhsap Dr. Lalhriatzuali Ralte kaihhruaina hnuaia Core Committee on Mission Chhanchhuahna-in a lo rel tawh angin, he mission pawimawh tak chungchang inhrilhhriatna leh hemi atana kawng inkawhhmuhna hun (help desk) hman a ni.
Rangvamual leh Phunchawng veng atangin chhungkaw aiawh thahnem tak he hunah hian an rawn tel thei a ni. Eizawnna mumal neilo, zu zawrh leh danin a phalloh te hmanga eizawng thinte chhanchhuahna project hi tha taka kalpui tum a ni a. Tunah hian, a bul tan nan MSDRB (SWTA Dept), LESDE dept., UD&PA dept., AMC, KVIB, Lead Bank leh SBI-RSETI te’n an scheme hrang hrang, loan leh service dang dangte hmanga eizawnna hmuh theih dan te, bul tan tur thil tul hriat ngai te inhrilhna hun atangin hma lak tan chhoh mek a ni.
Heng department te leh Bank hrang hrang aiawh mi 19 te’n zirtirna an pe a. Inhrilhfiah ngaite inhrilhfiahna hun hman anih bakah , sorkar scheme leh loan hmanga tanpui an nih theih dan tur te sawipui an ni. Rangvamual leh phunchawng a awareness programme leh Help Desk neihah hian mi 170 chuang an rawn tel thei a ni.
He Mission Chhanchhuahna atan hian Core Committee leh Working Committee din fel tawh ani a, Core Committee ah hian SP Aizawl chu Co-Chairman niin he mission chhanchhuahna turin a kaihhnawih department hrang hrang bakah kohhran leh tlawmngai pawl aiawh leh rilru lama harsatna enkawl thiam bikte pawh an tel a ni.
