Ministry of Skill Development (MSDE), Government of India hnuaia National Skill Development Corporation(NSDC) leh Skill India ṭangkawpin National Skill Competition - Indiaskills 2024, May ni 15 - 20, 2024 chhunga Yashobhoomi Covention Centre, Dwarka, New Delhi hmuna neihah Mizoram thalaiten Medal 8 a la a ni.
Labour, Employment, Skill Development and Entrepreneurship Department hmalaknain Mizoram chuan Indiaskills Competition 2024 a tel turin trade 16 ah Mizo ṭhalai 16 a tir a, an ni hi uluk taka State level a Mizoram aiawh tura lo thlan tawh te an ni. Intihsiakna hi May ni 16-19 chhunga neih niin, May ni 20 khan Yashobhoomi Convention Centre, Dwarka-ah Award Ceremony pui tak hman a ni a, Mizo ṭhalaite chuan hetiang hian lawmman an rawn dawng haw a ni:
- Maximus Lalruatkima - Gold Medal (Floristry)
- Vanlalbiakdiki - Gold Medal (Shoe Making)
- Emily VL Thakimi - Gold Medal (Fashion Technology)
- Anthony Lalchhanhima - Silver Medal (Drone Film Making)
- Laltlanzovi - Medallion of Excellence (MoE), (Hair Dressing)
- Vanlalhriatchhungi - Medallion of Excellence (MoE), (Beauty Therapy)
- Liansangrem - Medallion of Excellence (MoE), (Plumbing & Heating)
- Lallawmkima - Medallion of Excellence (MoE), (Electrical Installation)
Indiaskills 2024, National Competition-ah hian Competitors 1000 chuang State hrang hrang atanga State Winners theuhte kalkhawmin trade 61 hnuaiah intihsiakna an nei a, Mizo thalaite pawh Skill trade hrang hrang 16 hnuaiah an tel thei a ni. He intihsiakna Gold leh Silver dawngte hian Worldskills 2024, Lyon, France-a kumin September thla a neih turah India aiawhin intihsiakna an hmachhawn leh dawn a ni.
Mizoram Team-te hi LESDE Department Director, Pi Angela Zothanpuii hovin Official mi paruk ten an hruai a. Mizoram hi Indiaskills competition-ah a tum hnih telna niin kum 2022 khan Medal pahnih, Gold leh Bronze lo la tawhin, kumin hian Medal pariat(8) an la leh thei a ni.
Mizoram Team te hi vawiin (20.05.2024) khan Mizoram lo thlengin, Lawmna Inkhawm tawi Airport chawlhbuk hmunah Department-in an lo buatsaih a, Officials leh participants Nu leh Pa ten he hun tawi hi an hmang ho thei a ni.
